《香港01》成篇聲明東拉西扯、不知所云，究竟係你理解錯人哋個聲明講咩，定係你只係想以「新聞自由」做招牌，背後繼續遮醜？
「只要細讀報道內容，當可發現它對所謂的「敏感」話題無所迴避，並無扭曲受訪者言論，反而恰恰盡了責任切切實實將事實呈現予受眾。無視於此就作出杞人憂天式評論，實屬大驚小怪。」喂，你有冇睇清楚記協喺聲明講緊咩？而家成件事唔係針對緊你點訪問林昶佐，唔係針對你點樣寫呢篇訪問。而係針對緊你「加編者按反對台獨」。好，你喺開頭有講一句「讀者作出善意提點，我們會誠心吸收。」嚟講呢句，但係之後嘅篇幅全部錯哂焦點，混淆視聽。
你成篇聲明都係講緊自己點樣以「中立」、「不偏不倚」嘅形式去寫報道，仲列埋多件香港發生嘅不公義事件，長氣地強調自己係幫邊邊。既然你要「中立」，點解仲要講呢啲咁嘅說話？喂，中立同騎牆派係兩回事嚟㗎喎，邊個話企係中間，就一定分開兩隻腳企？你咁樣同一般右翼同建制派二元對立有咩分別？
「我們也要坦然指出，新聞自由的基礎是多元化與獨立性，我們既不為取悅在位者或擔心受壓而作政治審查，也不接受外人基於意識形態偏見或政治正確而指手劃腳，干預我們的自主編採工作。」呢點就仲詭異，既然你咁強調中立同獨立，係咪用一句「反台獨」就可以將記者同林昶佐嘅立場分開，就話「獨立啲」？你而家係赤裸裸話俾人聽，「嗱！佢點支持台獨都唔關我事㗎，我只係為份工而訪問佢同寫稿，唔好因為我訪問佢，就當埋我都係台獨份子啊。」喂，其實冇人想知你係支持定反對，既然你要中立嘅，點解要無私顯見私，係都要將呢件事同對方劃清界線？究竟你係心虛，定係上頭命令要「偽中立」呃讀者呢？又係啦，二元對立累死人。
「切莫忘記，記協是記者工會，會章中各項保障記者權益的條款中，第一條便是「爭取及維持公平與合理的工資率、工作時間及其他僱傭條件，及廣泛保障會員的利益」。」嘩，好大嘅官威啊。你以為你自己係鄭若驊咁「巴閉」？你呢句好似提點緊記協，「嗱，唔好借啲意將問題政治化，關注記者嘅生活好過啦，點解要將呢件事攞嚟討論，搞到咁政治化姐。」我唔評論記協過往嘅一啲行為，但係今次記協出聲明斟酌你嗰句「編者按」，係質疑你嘅「中立同獨立性」，佢都係做緊你篇聲明強調嘅傳媒良心姐，莫非你嘅傳媒良心有第二把尺嚟量度？你唔夠人講，跟住就做返道德判官話人哋屈你，話返人哋記協嘅是非，你同一般人「翻舊帳」、「搵是非嚟講」有咩分別？
曾幾何時，我曾經幫01寫過一篇稿，但我可以話，呢個係我人生嘅一大污點。可以嘅話，唔該delete咗我篇稿。因為我都想同你哋劃清界線。